Sex

Mainit.

Masarap.

Nang marinig ko ito ay naintriga rin ako tulad ng iba kong mga kasama. Akala ko nung una ay hindi ko ito magugustuhan, pero di nagtagal matapos kong makatikim ay nasarapan na rin ako. Madalas daw ay marami rito tuwing umaga, ngunit tanghali na nang amin itong subukan. Ganito pala ang pakiramdam. Mula noong araw na iyon ay hinahanap hanap ko na ang sex.

Mabilis lang ang serbisyo dito. Pagdating na pagdating namin ay may babae agad na lumapit sa amin upang kami ay alukin, at kami naman ay agad pumayag sa sobrang excitement. Ipinakita naman niya sa amin ang pagpipilian at di nagtagal ay nagkasundo na kami sa aming mga kukunin. Mabilis naman niya itong inihudyat sa kanyang mga kasama upang ihanda na para dalhin ang mga ito sa amin.

Ilang minuto lang ay dinala na sa amin ang mga hiningi ng bawat isa. Sa unang tingin pa lang ay naisip ko nang kami ay masasarapan sa aming titikman, at hindi ako nagkamali. Ang aming ibinayad ay nasulit naman ng husto. Ni walang pag-aalinlangan o pagsisisi sa loob ko na ginawa ko ang bagay na iyon. Bukod sa meron akong kasama noon, lahat naman kasi ay may first time ika nga nila.

Masarap pa rin pala kumain sa Sinangag EXpress kahit tanghaling tapat. Yung pinuntahan namin ay matatagpuan sa Vito Cruz, malapit sa Tahilan Residence. Marami kang pagpipiliang ulam, kasama ng sinangag na kanilang ipinagmamalaki at mura lang ang mga ito. Bukas sila beinte-kwatro oras, at sinisiguro kong sulit ang punta niyo rito. (Anong iniisip mo ha?)